YouTube आउटेज: शुक्रवारी काही काळासाठी YouTube ची सेवा ठप्प झाल्याने जगभरातील हजारो वापरकर्त्यांना अडचणींचा सामना करावा लागला. व्हिडिओ प्ले न होणे, वेबसाइट उघडण्यास विलंब आणि अॅपमध्ये तांत्रिक त्रुटी अशा समस्या अचानक समोर आल्याने वापरकर्त्यांनी थेट X (पूर्वीचे ट्विटर) गाठले. मात्र, तक्रारींसोबतच या आउटेजचे रूपांतर काही वेळातच मीम्सच्या महोत्सवात झाले.
आउटेज ट्रॅक करणाऱ्या Downdetector या संकेतस्थळानुसार, Google-मालकीच्या YouTube वर जागतिक स्तरावर तांत्रिक बिघाड नोंदवण्यात आला. या आउटेजदरम्यान कमाल टप्प्यावर तब्बल १०,८०० हून अधिक तक्रारी नोंदल्या गेल्या. सुरुवातीला सुमारे ३,५०० तक्रारी आल्या, त्यानंतर काही मिनिटांतच हा आकडा झपाट्याने वाढत ७,००० च्या पुढे गेला आणि पुढे ११,००० चा टप्पा ओलांडला.
Downdetector च्या आकडेवारीनुसार, सुमारे ७३ टक्के वापरकर्त्यांना YouTube वेबसाइट अॅक्सेस करण्यात अडचणी येत होत्या. तर १८ टक्के वापरकर्त्यांनी व्हिडिओ स्ट्रीमिंगमध्ये समस्या असल्याचे सांगितले आणि उर्वरित ९ टक्के वापरकर्त्यांना मोबाईल अॅपवर बिघाडाचा अनुभव आला.
दरम्यान, YouTube कडून या तांत्रिक बिघाडाबाबत काही वेळातच सुधारणा करण्यात आली असून सेवा हळूहळू पूर्ववत करण्यात आल्याचे सांगण्यात आले. मात्र, या काही मिनिटांच्या आउटेजने सोशल मीडियावर मोठी चर्चा निर्माण केली. अनेक वापरकर्त्यांनी आपल्या मजेशीर प्रतिक्रिया, मीम्स आणि पोस्ट्स शेअर करत #YouTubeDown हा हॅशटॅग ट्रेंडमध्ये आणला.
सेवा पुन्हा सुरू झाल्यानंतरही काही काळ वापरकर्त्यांमध्ये संभ्रमाचे वातावरण होते. मात्र, YouTube पूर्ववत झाल्यानंतर वापरकर्त्यांनी सुटकेचा श्वास घेतला. तरीदेखील, या छोट्याशा आउटेजने सोशल मीडियावर मोठा डिजिटल गदारोळ निर्माण केला, हे मात्र नक्की.
