भंडारा – प्रतिनिधी
छत्रपती शिवाजी महाराज यांच्याबाबत करण्यात आलेल्या वक्तव्यावरून भंडाऱ्यात राजकीय वातावरण तापले असून भारतीय जनता पक्षाने महाराष्ट्र प्रदेश काँग्रेस अध्यक्ष हर्षवर्धन सपकाळ यांचा तीव्र निषेध केला आहे. टीपू सुलतान यांच्याशी शिवाजी महाराजांची तुलना केल्याचा आरोप करत भाजपने हे वक्तव्य महाराष्ट्राच्या अस्मितेचा अपमान असल्याचे म्हटले आहे.
गांधी चौकात भाजपचे आंदोलन
या प्रकरणाच्या निषेधार्थ भंडाऱ्यातील गांधी चौक येथे भाजप पदाधिकाऱ्यांनी आंदोलन केले. यावेळी मोठ्या संख्येने कार्यकर्ते उपस्थित होते. आंदोलनादरम्यान “छत्रपती शिवाजी महाराजांचा अपमान सहन केला जाणार नाही” अशा घोषणा देत संताप व्यक्त करण्यात आला.
“शिवाजी महाराजांचे कार्य सर्वसमावेशक” – भाजप
भाजपच्या पदाधिकाऱ्यांनी यावेळी सांगितले की, छत्रपती शिवाजी महाराजांचे कार्य हे लोककल्याणकारी, सर्वसमावेशक आणि न्याय्य राज्यकारभाराचे प्रतीक आहे. त्यांच्या कार्याची तुलना इतर कोणत्याही ऐतिहासिक व्यक्तीशी करणे ही महाराष्ट्राच्या इतिहासाचा व संस्कृतीचा अपमान असल्याचे त्यांनी नमूद केले.
सपकाळ यांनी तात्काळ माफी मागावी
भाजपने हर्षवर्धन सपकाळ यांनी केलेल्या वक्तव्याबद्दल तात्काळ जाहीर माफी मागावी, अशी मागणी केली आहे. अन्यथा जनतेच्या रोषाला सामोरे जावे लागेल, असा इशाराही भाजपने दिला आहे.
जिल्हाध्यक्ष आशु गोंडाने यांची उपस्थिती
या आंदोलनात भाजप भंडारा जिल्हाध्यक्ष आशु गोंडाने यांच्यासह अनेक पदाधिकारी आणि कार्यकर्ते मोठ्या संख्येने सहभागी झाले होते. आंदोलनादरम्यान प्रशासनाने कायदा व सुव्यवस्था राखण्यासाठी योग्य ती खबरदारी घेतली होती.
