भंडारा – प्रतिनिधी
दहा दिवसांच्या नवजात बाळाच्या कथित विक्री प्रकरणामुळे भंडारा जिल्ह्यात खळबळ उडाली असून या प्रकरणाच्या तपासावरच आता प्रश्नचिन्ह निर्माण झाले आहे. वरठी पोलीस स्टेशन येथे ६ फेब्रुवारी रोजी गुन्हा दाखल झाल्यानंतर पोलिसांनी दिलेल्या प्रेस नोटमध्ये मुख्य आरोपी डॉक्टरचे नाव नसल्याने वाद अधिक चिघळला आहे. यावरून आमदार नरेंद्र भोंडेकर यांनी पोलिस प्रशासनावर गंभीर आरोप करत दबावाखाली काम सुरू असल्याचा संशय व्यक्त केला आहे.
मुख्य आरोपीचे नाव गायब; संशयाची छाया
या प्रकरणात मुख्य आरोपी म्हणून डॉ. नितेश वाजपेयी यांचे नाव पुढे येत असतानाही पोलिसांच्या अधिकृत प्रेस नोटमध्ये त्यांचा उल्लेख नसल्याचे समोर आले आहे. यामुळे तपासाची दिशा आणि पारदर्शकतेबाबत प्रश्न उपस्थित झाले आहेत. आमदार भोंडेकर यांनी यावर कठोर प्रतिक्रिया देत, “डॉक्टर दोनदा भंडाऱ्यात येऊन गेले, तरीही पोलिसांना त्याची माहिती नव्हती का?” असा थेट सवाल उपस्थित केला आहे.
बाळ विक्रीचा धक्कादायक प्रकार
गोंदिया येथील एका रुग्णालयात जन्मलेल्या नवजात बालिकेची सुमारे अडीच लाख रुपयांत विक्री झाल्याचा गंभीर आरोप या प्रकरणात करण्यात आला आहे. या प्रकरणात एका महिलेसह सागर सिक्का याला अटक करण्यात आली आहे. पोलिसांच्या माहितीनुसार मुख्य आरोपीसह आणखी तीन जण सध्या फरार आहेत.
चालकाची कबुली; तपासावर अधिक प्रश्न
डॉ. वाजपेयी यांच्या चालकाने पोलिसांना दिलेल्या कबुलीजबाबात डॉक्टर दोन वेळा भंडाऱ्यात आल्याची माहिती दिली आहे. त्यामुळे पोलिसांना याची माहिती नव्हती का, की माहिती असूनही कारवाई टाळण्यात आली, असा संशय अधिक गडद झाला आहे.
भोंडेकरांची कडक भूमिका
आमदार नरेंद्र भोंडेकर यांनी या संपूर्ण प्रकरणाची सखोल चौकशी करण्याची मागणी करत, पोलिस प्रशासनावर दबावाखाली काम केल्याचा आरोप केला आहे. तसेच ते लवकरच राज्याचे पोलीस महासंचालक (DGP), संबंधित विभागाचे सचिव आणि गृहमंत्र्यांची भेट घेऊन या प्रकरणाची तक्रार करणार असल्याचे त्यांनी स्पष्ट केले आहे.
पुढील तपासाकडे लक्ष
या प्रकरणातील मुख्य आरोपी अद्याप फरार असल्याने पोलिसांच्या तपासावर सर्वांचे लक्ष लागले आहे. दोषींवर कठोर कारवाई व्हावी आणि संपूर्ण प्रकरणाची निष्पक्ष चौकशी व्हावी, अशी मागणी नागरिकांकडून होत आहे.
