भंडारा | प्रतिनिधी
जिल्ह्यात वाढत्या दुचाकी चोरीच्या घटनांना आळा घालण्यात पोलिसांना मोठे यश आले असून आंतरजिल्हा स्तरावर सक्रिय असलेल्या दुचाकी चोरट्यांच्या टोळीचा पर्दाफाश करण्यात आला आहे. या कारवाईत दोन बालगुन्हेगारांसह एकूण सहा जणांना अटक करण्यात आली असून त्यांच्या ताब्यातून चोरीच्या १४ दुचाकी जप्त करण्यात आल्या आहेत.
पोलिसांनी दिलेल्या माहितीनुसार, जिल्ह्यात सातत्याने होत असलेल्या दुचाकी चोरीच्या घटनांच्या पार्श्वभूमीवर विशेष पथक गठित करण्यात आले होते. या पथकाने राबविलेल्या गोपनीय मोहिमेदरम्यान भीमसेन रामटेके आणि सचिन तरोणे या दोघांना ताब्यात घेण्यात आले. त्यांच्या सखोल चौकशीतून आंतरजिल्हा दुचाकी चोरी करणारी मोठी टोळी उघडकीस आली.
या टोळीने साकोली पोलीस स्टेशन हद्दीतून नऊ, लाखनीतून एक, पालांदूरमधून एक तसेच गोंदिया जिल्ह्यातून आठ अशा एकूण १९ दुचाकी चोरी केल्याची कबुली दिली आहे. पोलिसांनी आतापर्यंत १४ दुचाकी जप्त केल्या असून उर्वरित वाहनांचा शोध सुरू आहे.
चोरी केलेल्या दुचाकींपैकी पाच वाहनांची मोडतोड करून त्यांचे सुटे भाग भंगारात विकल्याचेही तपासात समोर आले आहे. या प्रकरणात संबंधित भंगार विक्रेत्याविरुद्धही गुन्हा दाखल करण्यात आला आहे. जप्त केलेल्या दुचाकींची अंदाजे किंमत सुमारे ६ लाख ९० हजार रुपये असल्याचे पोलिसांनी सांगितले.
या कारवाईमुळे जिल्ह्यातील प्रलंबित दुचाकी चोरीच्या गुन्ह्यांचा तपास वेगाने पूर्ण होण्यास मदत होणार असून नागरिकांमध्येही दिलासा व्यक्त केला जात आहे. पोलिसांनी नागरिकांना आपली वाहने सुरक्षित ठिकाणी उभी करण्याचे तसेच संशयास्पद हालचाली आढळल्यास त्वरित पोलिसांना कळवण्याचे आवाहन केले आहे.
