साकोली | प्रतिनिधी
भंडारा जिल्ह्यातील साकोली तालुक्यातील गोंडउमरी परिसरात पोलिस पथकावर हल्ला करून शासकीय कामात अडथळा निर्माण करणाऱ्या सात जणांना साकोली पोलिसांनी तातडीने अटक केली आहे. या प्रकरणात संबंधित आरोपींविरुद्ध शासकीय कामात अडथळा, पोलिस कर्मचाऱ्यांना मारहाण, शिवीगाळ आणि जीवे मारण्याची धमकी दिल्याप्रकरणी गुन्हा दाखल करण्यात आला आहे. या कारवाईनंतर परिसरात कायदा व सुव्यवस्था कायम ठेवण्यासाठी पोलिसांनी गस्त वाढविली आहे.
नेमके काय घडले?
पोलिसांनी दिलेल्या माहितीनुसार, १५ जून रोजी रात्री सुमारे ९ वाजताच्या सुमारास साकोली पोलिस ठाण्यातील पोलिस नाईक सचिन कापगते व पोलिस हवालदार दिनेश तिजारे हे गोंडउमरी परिसरात नियमित पेट्रोलिंग करत होते. त्यावेळी जावेद बोरकर यांच्या दुकानासमोर १५ ते २० जणांची गर्दी होऊन भांडण व गोंधळ सुरू असल्याची माहिती पोलिसांना मिळाली.
घटनास्थळी पोहोचलेल्या पोलिसांनी संबंधितांना वाद थांबवून घरी जाण्याचे आवाहन केले. मात्र, उपस्थित काही जणांनी पोलिसांचे आदेश न पाळता उलट त्यांच्याशी हुज्जत घातली. तसेच पोलिस कर्मचाऱ्यांना धक्काबुक्की, शिवीगाळ करत जीवे मारण्याची धमकी दिली. या प्रकारामुळे शासकीय कामात अडथळा निर्माण झाल्याचे पोलिसांनी नमूद केले आहे.
सात आरोपींना तातडीने अटक
या प्रकरणात पोलिसांनी खालील सात जणांना अटक केली आहे.
- विश्वनाथ परसराम चांदेवार
- अविनाश जीवन चांदेवार
- जीवन परसराम चांदेवार
- अरुण कोंडुजी कमलेकर
- शशांक निताराम दोनोडे
- पराग निताराम दोनोडे
- राजू कोंडुजी कमलेकर
याशिवाय एका विधीसंघर्षग्रस्त बालकाचाही या घटनेत सहभाग असल्याचे पोलिस तपासात समोर आले आहे.
पोलिस निरीक्षकांचा इशारा
साकोली पोलिस ठाण्याचे पोलिस निरीक्षक एस. पी. आचरेकर यांनी स्पष्ट इशारा देताना सांगितले की, कर्तव्यावर असलेल्या पोलिस कर्मचाऱ्यांशी गैरवर्तन, मारहाण, शिवीगाळ करणे किंवा शासकीय कामात अडथळा निर्माण करणे हा गंभीर गुन्हा आहे. अशा प्रकारांना कोणतीही सहनशीलता दाखविण्यात येणार नाही. पोलिस गणवेशाला हात लावणाऱ्यांवर कायद्यानुसार कठोर कारवाई करण्यात येईल.
पुढील तपास सुरू
पोलिस नाईक सचिन कापगते यांच्या तक्रारीवरून साकोली पोलिस ठाण्यात गुन्हा नोंदविण्यात आला आहे. या प्रकरणाचा पुढील तपास सहाय्यक पोलिस निरीक्षक जितेंद्र राजूरकर यांच्या मार्गदर्शनाखाली सुरू असून, घटनेशी संबंधित इतर बाबींचीही चौकशी केली जात आहे.
