भंडारा | प्रतिनिधी
भंडारा शहरातील कन्या डॉ. नमीरा सिद्दीकी यांनी NEET MDS 2026 प्रवेश परीक्षेत अखिल भारतीय स्तरावर (AIR-1) प्रथम क्रमांक पटकावत भंडारा जिल्ह्यासह संपूर्ण विदर्भाचे नाव देशभरात उज्ज्वल केले आहे. त्यांच्या या उल्लेखनीय यशामुळे शैक्षणिक क्षेत्रात आनंद आणि अभिमानाचे वातावरण निर्माण झाले आहे.
राष्ट्रीय पात्रता व प्रवेश परीक्षा (NEET MDS 2026) मध्ये देशभरातील 31 हजारांहून अधिक उमेदवार सहभागी झाले होते. या कठीण स्पर्धेत डॉ. नमीरा सिद्दीकी यांनी 960 पैकी 802 गुण मिळवत देशात प्रथम क्रमांक मिळवला. त्यांच्या या यशामुळे त्या देशातील दंतवैद्यकीय शिक्षण क्षेत्रातील विद्यार्थ्यांसाठी प्रेरणास्थान ठरल्या आहेत.
डॉ. नमीरा सिद्दीकी यांनी नागपूर येथील दंत महाविद्यालयातून बीडीएसचे शिक्षण पूर्ण केले. त्यानंतर त्यांनी हिंगणा येथील स्वर्गीय दादासाहेब काळमेघ दंत महाविद्यालयातून बीडीएस पदवी प्राप्त केली. फेब्रुवारी 2025 मध्ये त्यांना पदवी प्रदान करण्यात आली होती. मार्च 2026 मध्ये त्यांनी इंटर्नशिप पूर्ण केली आणि त्याच काळात NEET MDS परीक्षेची तयारी सुरू ठेवली.
भंडारा शहरातील रहिवासी असलेल्या डॉ. नमीरा यांच्या वडिलांचा स्थानिक स्तरावर व्यवसाय असून, त्यांच्या कुटुंबाने शिक्षणाला नेहमीच प्राधान्य दिले. कठोर परिश्रम, सातत्य आणि आत्मविश्वासाच्या जोरावर त्यांनी हे यश संपादन केले आहे.
निकाल जाहीर झाल्यानंतर प्रतिक्रिया देताना डॉ. नमीरा सिद्दीकी म्हणाल्या, “देशात प्रथम क्रमांक मिळवणे हा माझ्या आयुष्यातील अत्यंत आनंदाचा क्षण आहे. या यशामुळे मेहनतीचे फळ नक्की मिळते, हा माझा विश्वास अधिक दृढ झाला आहे. वैद्यकीय क्षेत्रात ज्ञानाबरोबरच संवेदनशीलता आणि रुग्णांप्रती दयाळूपणा देखील तितकाच महत्त्वाचा आहे.”
डॉ. नमीरा सिद्दीकी यांच्या या यशाबद्दल विविध क्षेत्रातील मान्यवर, शिक्षक, विद्यार्थी आणि नागरिकांकडून त्यांचे अभिनंदन करण्यात येत आहे. त्यांच्या यशामुळे भंडारा जिल्ह्याचे नाव राष्ट्रीय स्तरावर झळकले असून, अनेक विद्यार्थ्यांना मोठी प्रेरणा मिळाली आहे.
