भंडारा, दि. 16 फेब्रुवारी 2026 : भंडारा जिल्ह्यातील लाखनी तालुक्यातील पालांदूर येथील गोविंद विद्यालयाच्या खाजगी वसतिगृहात विद्यार्थ्यांना निकृष्ट आणि शिळे अन्न दिले जात असल्याचा गंभीर आरोप समोर आला आहे. या प्रकारामुळे विद्यार्थ्यांच्या आरोग्याचा प्रश्न निर्माण झाला असून वसतिगृहाच्या कार्यप्रणालीवरही प्रश्नचिन्ह उपस्थित झाले आहे. वसतिगृहात राहणाऱ्या विद्यार्थ्यांनी असा आरोप केला आहे की रात्रीचे उरलेले जेवण सकाळी आणि सकाळचे जेवण रात्री दिले जाते. त्यामुळे विद्यार्थ्यांना ताजे अन्न मिळत नसून त्यांच्या आरोग्यावर परिणाम होण्याची भीती व्यक्त केली जात आहे. काही विद्यार्थ्यांनी या प्रकाराबाबत नाराजी व्यक्त करत तक्रारी केल्या असून या प्रकरणाने परिसरात खळबळ उडाली आहे.
समाजकल्याण विभागाच्या वतीने या वसतिगृहांवर मोठ्या प्रमाणावर खर्च केला जातो, मात्र प्रत्यक्षात विद्यार्थ्यांच्या सोयी-सुविधांकडे व्यवस्थापनाकडून दुर्लक्ष होत असल्याचे चित्र दिसत आहे. स्वच्छता, अन्नाची गुणवत्ता आणि वेळेवर जेवण देणे या मूलभूत बाबींमध्ये त्रुटी आढळत असल्याचा आरोप विद्यार्थ्यांकडून करण्यात आला आहे. अचानक उघडकीस आलेल्या या प्रकारामुळे पालकांमध्येही चिंता व्यक्त केली जात असून आपल्या मुलांच्या आरोग्याबाबत प्रशासनाने लक्ष देण्याची मागणी केली जात आहे. स्थानिक नागरिकांनीही या घटनेचा निषेध करत संबंधित वसतिगृहाची तातडीने चौकशी करण्याची मागणी केली आहे.
विद्यार्थ्यांच्या म्हणण्यानुसार या वसतिगृहात अनेक दिवसांपासून अन्नाच्या गुणवत्तेबाबत तक्रारी केल्या जात होत्या, मात्र त्याकडे दुर्लक्ष करण्यात आले. त्यामुळे आता प्रशासनाने स्वतः पुढाकार घेऊन वसतिगृहाची तपासणी करावी, जबाबदारांवर कारवाई करावी आणि विद्यार्थ्यांना योग्य सुविधा उपलब्ध करून द्याव्यात अशी मागणी जोर धरू लागली आहे. ही घटना केवळ एका वसतिगृहापुरती मर्यादित नसून विद्यार्थ्यांच्या मूलभूत हक्कांशी संबंधित असल्याचे मत व्यक्त होत आहे. शिक्षणासोबतच स्वच्छ, सुरक्षित आणि पौष्टिक अन्न देणे ही व्यवस्थापनाची जबाबदारी आहे आणि त्याकडे दुर्लक्ष होऊ नये यासाठी प्रशासनाने तातडीने हस्तक्षेप करणे आवश्यक असल्याची मागणी आता सर्व स्तरातून होत आहे.
