भंडारा, दि. 16 फेब्रुवारी 2026 : भंडारा जिल्ह्यातील लाखनी तालुक्यात बिबट्याचा थरारक प्रकार समोर आला असून बिबट्याला पकडण्यासाठी गेलेल्या वन विभागाच्या पथकावरच बिबट्याने अचानक हल्ला केल्याने काही काळ परिसरात भीतीचे वातावरण निर्माण झाले होते. मात्र वनकर्मचाऱ्यांनी धाडस आणि चातुर्य दाखवत अचूक निशाणा साधत बिबट्याला काही क्षणांत बेशुद्ध केले आणि मोठा अनर्थ टळला. या संपूर्ण घटनेचा थरारक क्षण कॅमेरात कैद झाला आहे.
मिळालेल्या माहितीनुसार, लाखनी परिसरातील गावांमध्ये गेल्या काही दिवसांपासून बिबट्याचे दर्शन होत असल्याच्या तक्रारी वन विभागाकडे प्राप्त होत होत्या. त्यामुळे नागरिकांमध्ये भीतीचे वातावरण होते. या पार्श्वभूमीवर वन विभागाचे पथक बिबट्याला पकडण्यासाठी घटनास्थळी पोहोचले. मात्र कारवाईदरम्यान बिबट्याने अचानक झेप घेत वनकर्मचाऱ्यांवर हल्ला चढवला. काही क्षणांसाठी गोंधळ उडाला, परंतु पथकातील अधिकाऱ्यांनी धीर न सोडता परिस्थिती नियंत्रणात आणली.
वनकर्मचाऱ्यांनी तात्काळ ट्रँक्विलायझर गनचा वापर करून बिबट्यावर अचूक निशाणा साधला. गोळी लागताच काही वेळातच बिबट्या बेशुद्ध पडला आणि त्यानंतर त्याला सुरक्षितरित्या पिंजऱ्यात टाकण्यात आले. या संपूर्ण कारवाईदरम्यान वनकर्मचाऱ्यांनी दाखवलेल्या धाडसाचे सर्वत्र कौतुक होत आहे. स्थानिक नागरिकांनीही सुटकेचा निश्वास सोडला असून वन विभागाचे आभार मानले आहेत.
सदर बिबट्याला वैद्यकीय तपासणीनंतर योग्य त्या जंगल परिसरात सोडण्यात येणार असल्याची माहिती वन विभागाकडून देण्यात आली आहे. दरम्यान, बिबट्याच्या हालचालींमुळे नागरिकांनी सतर्क राहावे आणि कोणतीही संशयास्पद हालचाल दिसल्यास तत्काळ वन विभागाला कळवावे, असे आवाहन करण्यात आले आहे.
