भंडारा | प्रतिनिधी
तूमसर आणि मोहाडी परिसरात अवैध वाळू वाहतुकीविरोधात कारवाई सुरू असतानाच धक्कादायक प्रकार समोर आला आहे. पोलिस व महसूल विभागाच्या कारवाईपासून बचाव करण्यासाठी नागपूरकडे जाणारी अवैध वाळू वाहतूक करणारे १७ ट्रक एका राईस मिलच्या परिसरात लपवून ठेवण्यात आल्याचा प्रकार उघडकीस आला आहे.
ही कारवाई वरठी येथील आमदार राजू करेमोरे यांच्या राईस मिल परिसरात करण्यात आली. मिळालेल्या गुप्त माहितीनुसार महसूल विभागाच्या पथकाने छापा टाकत मिल परिसरात दडवून ठेवलेले १७ वाळूचे ट्रक ताब्यात घेतले.
पोलिस व महसूल विभागाची संयुक्त कारवाई
अवैध वाळू वाहतुकीवर कारवाई तीव्र होत असताना संबंधित ट्रकचालकांनी ट्रक राईस मिलमध्ये लपवून ठेवण्याचा प्रयत्न केल्याचे समोर आले आहे. या प्रकरणात महसूल विभागाने पंचनामा करून ट्रक जप्त केले असून पुढील तपास सुरू आहे.
मोठ्या साखळीचा संशय
या घटनेमुळे अवैध वाळू वाहतुकीमागे मोठी साखळी कार्यरत असल्याचा संशय व्यक्त केला जात आहे. संबंधित ट्रक कोणाच्या मालकीचे आहेत, वाळू कुठून आणली गेली आणि नेमकी कुठे पाठवली जाणार होती, याचा तपास सुरू आहे.
कारवाई आणखी तीव्र होणार
प्रशासनाने स्पष्ट केले असून अवैध वाळू वाहतूक, साठवणूक व लपवणूक करणाऱ्यांवर कठोर कारवाई केली जाणार आहे. दोषींवर दंडात्मक व फौजदारी कारवाईची शक्यता नाकारता येत नाही.
