भंडारा | प्रतिनिधी
भंडारा–गोंदिया लोकसभा मतदारसंघातील शेतकऱ्यांसाठी दिलासादायक बातमी असून, धान खरेदीतील प्रलंबित चुकारा अखेर शेतकऱ्यांच्या खात्यात थेट जमा करण्यात आला आहे. खासदार डॉ. प्रशांत पडोळे यांनी सातत्याने केलेल्या पाठपुराव्यामुळे हजारो शेतकऱ्यांना आर्थिक दिलासा मिळाला आहे.
धान खरेदी केंद्रांवर शेतकऱ्यांनी पुरवलेल्या धानाचा चुकारा वेळेत न मिळाल्याने अनेक शेतकरी अडचणीत सापडले होते. शासनाच्या धोरणांतील विलंब, प्रशासकीय प्रक्रियांचा अडसर आणि तांत्रिक कारणांमुळे रक्कम थांबली होती. याबाबत शेतकऱ्यांनी वेळोवेळी तक्रारी केल्या होत्या.
संसदेत मुद्दा मांडून केंद्र सरकारचे लक्ष वेधले
या गंभीर प्रश्नाकडे दुर्लक्ष न करता खासदार डॉ. प्रशांत पडोळे यांनी लोकसभेत शेतकऱ्यांचा मुद्दा ठामपणे मांडला. संसदेत आवाज उठवतानाच त्यांनी केंद्र सरकार, अन्न व सार्वजनिक वितरण विभाग तसेच संबंधित यंत्रणांशी सातत्याने पत्रव्यवहार व बैठकांद्वारे पाठपुरावा केला.
६८ हजारांहून अधिक शेतकऱ्यांना लाभ
या प्रयत्नांना अखेर यश आले असून, भंडारा जिल्ह्यातील सुमारे ६८ हजारांहून अधिक शेतकऱ्यांच्या खात्यात थेट चुकारा रक्कम जमा झाली आहे. अनेक दिवसांपासून प्रतीक्षेत असलेल्या शेतकऱ्यांनी समाधान व्यक्त केले असून, आर्थिक अडचणी काही प्रमाणात दूर झाल्या आहेत.
शेतकरी संघटनांनी व्यक्त केला आनंद
चुकारा मिळाल्याने शेतकरी वर्गात आनंदाचे वातावरण आहे. शेतकरी संघटना आणि स्थानिक नागरिकांनी खासदार डॉ. प्रशांत पडोळे यांच्या भूमिकेचे कौतुक केले आहे. “शेतकऱ्यांच्या प्रश्नांसाठी संसदेत आवाज उठवणारा लोकप्रतिनिधी मिळाल्याचा अभिमान आहे,” अशी प्रतिक्रिया अनेक शेतकऱ्यांनी व्यक्त केली.
शेतकऱ्यांच्या प्रश्नांसाठी लढा सुरूच राहणार – पडोळे
याबाबत प्रतिक्रिया देताना खासदार डॉ. प्रशांत पडेळे म्हणाले,
“शेतकऱ्यांना त्यांचा हक्काचा पैसा वेळेत मिळणे अत्यंत महत्त्वाचे आहे. धान खरेदीतील कोणताही अन्याय खपवून घेतला जाणार नाही. शेतकऱ्यांच्या प्रश्नांसाठी माझा लढा पुढेही सुरू राहील.”
धान खरेदी, दरवाढ, विमा, अनुदान आणि सिंचन यांसारख्या मुद्द्यांवरही पुढील काळात ठोस भूमिका घेतली जाईल, असे त्यांनी स्पष्ट केले.
