साकोली (भंडारा): साकोली–लाखांदूर मार्गावरील प्रमुख चौकात उभारण्यात येणाऱ्या डिजिटल प्रवासी निवाऱ्यांसाठी १८ लाख रुपयांचा निधी मंजूर करण्यात आला आहे. या निर्णयामुळे दररोज प्रवास करणाऱ्या नागरिकांना सुरक्षित व आधुनिक सुविधा मिळणार आहेत.
या प्रवासी निवाऱ्यांचा लाभ विद्यार्थी, महिला, ज्येष्ठ नागरिक, कर्मचारी, व्यापारी तसेच ग्रामीण भागातील प्रवासी यांना होणार आहे. सध्या ऊन, पाऊस व अपुऱ्या सुविधांमुळे प्रवाशांना अनेक अडचणींचा सामना करावा लागत असून, त्या समस्या लक्षात घेऊन हा निधी मंजूर करण्यात आला आहे.
डिजिटल प्रवासी निवाऱ्यांमध्ये बसचे वेळापत्रक, मार्ग माहिती, एलईडी डिस्प्ले, प्रकाश व्यवस्था, आसन व्यवस्था तसेच डिजिटल जाहिरातींची सुविधा उपलब्ध असणार आहे. यामुळे प्रवाशांना आवश्यक माहिती वेळेवर मिळून प्रवास अधिक सोयीचा होणार आहे.
हा निधी आमदार निधीतून मंजूर करण्यात आला असून, लवकरच प्रत्यक्ष कामास सुरुवात होणार असल्याची माहिती देण्यात आली आहे. या उपक्रमामुळे साकोली शहरातील सार्वजनिक वाहतूक व्यवस्था अधिक सक्षम होणार असून नागरिकांनी या निर्णयाचे स्वागत केले आहे.
