रामटेक | प्रतिनिधी
रामटेक तालुक्यातील प्रसिद्ध पर्यटनस्थळ खिंडसी तलावातून लवकरच सीप्लेन सेवा सुरू होणार असून, या महत्त्वाकांक्षी प्रकल्पामुळे परिसराच्या विकासाला नवे पंख मिळणार आहेत. केंद्र सरकारच्या ‘उडान’ (UDAN) योजनेअंतर्गत ही सेवा सुरू करण्यासाठी हालचालींना वेग आला आहे.
मिळालेल्या माहितीनुसार, 29 मार्च 2026 रोजी एरो सर्व्हिसेस प्रा. लि. (मेहर) कंपनीच्या अधिकाऱ्यांनी खिंडसी तलाव परिसराची पाहणी करून आवश्यक सुविधांचा आढावा घेतला. या प्रकल्पासाठी पायाभूत सुविधा, सुरक्षा व्यवस्था आणि उड्डाण संचालनासंदर्भात सकारात्मक प्रतिसाद मिळाल्याची माहिती समोर आली आहे.
या प्रकल्पासाठी स्थानिक आमदार आशिष जयस्वाल यांनी महत्त्वपूर्ण पुढाकार घेतला असून, त्यांच्या सातत्यपूर्ण प्रयत्नांमुळेच ही योजना प्रत्यक्षात येत असल्याचे सांगितले जात आहे. विशेष म्हणजे, या सेवेसाठी सुरुवातीला 9-सीटर सीप्लेन वापरण्यात येणार असून, भविष्यात मागणी वाढल्यास 19-सीटर विमानांची सुविधाही उपलब्ध करून देण्याची योजना आहे.
या सीप्लेन सेवेमुळे रामटेकचा नागपूर, मुंबई, पुणे तसेच अमरावतीसारख्या प्रमुख शहरांशी थेट हवाई संपर्क प्रस्थापित होणार आहे. यामुळे पर्यटन क्षेत्राला मोठी चालना मिळणार असून, स्थानिक रोजगारनिर्मितीलाही हातभार लागणार आहे.
याशिवाय, सुमारे 2000 रुपयांमध्ये हवाई प्रवासाची सुविधा उपलब्ध होणार असल्याचे सांगितले जात आहे, ज्यामुळे सामान्य नागरिकांनाही हवाई प्रवासाचा अनुभव घेता येणार आहे. खिंडसी तलाव, रामटेक गड मंदिर आणि पेंच टायगर रिझर्व यांसारख्या पर्यटनस्थळांकडे पर्यटकांचा ओढा वाढण्याची शक्यता व्यक्त केली जात आहे.
महाराष्ट्र एअरपोर्ट डेव्हलपमेंट कंपनी (MADC) च्या माध्यमातून या प्रकल्पाची अंमलबजावणी केली जाणार असून, पाण्यावरून उड्डाण करणाऱ्या या विमानांसाठी आवश्यक जेट्टी, सुरक्षा यंत्रणा आणि इतर तांत्रिक सुविधा उभारल्या जाणार आहेत.
स्थानिक नागरिक आणि व्यावसायिकांनी या प्रकल्पाचे स्वागत केले असून, यामुळे रामटेक परिसराच्या सर्वांगीण विकासाला गती मिळेल, असा विश्वास व्यक्त केला जात आहे.
एकंदरीत, खिंडसी तलावातून सुरू होणारी सीप्लेन सेवा ही केवळ पर्यटनासाठीच नव्हे, तर संपूर्ण रामटेक तालुक्याच्या आर्थिक आणि सामाजिक प्रगतीसाठी महत्त्वाची ठरणार आहे.
